A Facultade de Ciencias Empresariais e Turismo do campus de Ourense acolleu este venres a celebración do coloquio É o AVE a solución aos nosos males? O seu obxectivo foi reflexionar sobre o impacto da alta velocidade na cidade e na provincia de Ourense. Para facelo, contou coa participación de Carmen Sampayo, decana do Colexio de Economistas de Ourense; Julio Iglesias, asesor executivo do Grupo REVI; e Carlos de la Peña, economista e exdirector xeral de ADIF. A mesa estivo moderada José Ángel Vázquez Barquero, director do Departamento de Fundamentos da Análise Económica e Historia Económica da UVigo e coordinador da actividade.
Na presentación do coloquio, José Ángel Vázquez Barquero explicou que con el arranca unha nova edición dos Encontros no Campus, que ao igual que o curso pasado teñen como obxectivo ser “un punto de encontro” no que establecer “un diálogo tranquilo sobre temas importantes para a nosa cidade e para a nosa provincia”. Nestas actividades, sinalou, participarán profesionais, empresariado, representantes de colectivos significativos na provincia, etc co obxectivo de “discutir, falar e intercambiar puntos de vista”. Neste senso, Jesús Vázquez, decano da Facultade de Ciencias Empresariais e Turismo, apuntou a importancia de que máis alá da docencia e da investigación, a universidade e neste caso a súa facultade sexan tamén “un punto de encontro de xeración de ideas, de opinión”, un espazo “no que e recoller o pensamento de Ourense”.
Este xoves arrancou na Facultade de Ciencias Empresariais e Turismo do campus de Ourense a celebración do XVII Congreso Galego de Estatística e Investigación de Operacións, organizado polo Departamento de Estatística e Investigación Operativa da Universidade de Vigo e a Sociedade Galega para a Promoción da Estatística e a Investigación de Operacións (Sgapeio). A cita reúne a arredor de 130 profesionais co obxectivo de contribuír á divulgación dos avances na teoría, nas aplicacións e na didáctica destas disciplinas das matemáticas.
O congreso, que se prolongará ata o sábado, foi inaugurado por Francisco Javier Rodríguez, vicerreitor do campus de Ourense; José Alberto Díez de Castro, secretario xeral de Universidades da Xunta de Galicia; Rosendo Fernández, deputado provincial; César Andrés Sánchez, presidente de Sgapeio, e Ana Pérez, co-presidenta do comité organizador do evento. Nas súas intervencións puxeron en valor a importancia da estatística e da investigación de operacións nos diferentes eidos profesionais, desde o académico e o económico ata o sanitario e agrario, e a importancia de contar con foros coma este congreso para o intercambio de coñecementos e inquedanzas.
A Facultade de Ciencias Empresariais e Turismo do campus de Ourense acolleu este martes a celebración da conferencia Terras Gauda: un caso de éxito na transición xeracional. Foi ofrecida por Antón Fonseca, CEO e vicepresidente do Grupo Terras Gauda, e presidente do Fórum Familiar da Asociación Galega de Empresa Familiar. O convidado explicou en detalle ao alumnado presente as características e traxectoria do seu grupo bodegueiro e a súa xestión como empresa familiar. O acto estivo organizado desde Ecobas e a Cátedra de Empresa Familiar da UVigo e contou coa participación na apertura de Francisco Javier Rodríguez Rajo, vicerreitor do campus de Ourense; Jesús Vázquez, decano da Facultade de Ciencias Empresariais e Turismo, e Elena Rivo, profesora deste centro e directora da citada cátedra. Tendo en conta a relevancia da empresa familiar no contexto económico galego, a sesión tivo como obxectivo que o alumnado puidese coñecer un dos seus casos de éxito en primeira persoa, achegándose, entre outros, a un dos seus elementos máis críticos, a sucesión ou continuidade.
Sensibilizar e capacitar ao estudantado da Universidade de Vigo para identificar e comprender as violencias machistas no contexto universitario, con especial atención ao acoso sexual e ao acoso por razón de sexo é un dos dous obxectivos do proxecto piloto Voces de cambio que arrancará no mes de setembro co inicio do novo curso. A segunda das súas finalidades é, como explica a directora da Unidade de Igualdade da UVigo, Yolanda Rodríguez, “dotar ás persoas participantes de ferramentas prácticas para actuar como axentes de cambio, promovendo actuacións preventivas, de apoio e derivación axeitada en situacións de violencia machista, tanto presenciais como en contornas dixitais”.
Unha decena de centros dos tres campus da UVigo: as facultades de Historia; Educación e Traballo Social e de CC Empresariais e Turismo de Ourense; Fisioterapia en Pontevedra e de CC Económicas, CC do Mar e CC Xurídicas e do Traballo, ademais das escolas de Telecomunicación e Enfermaría de Povisa e do Meixoeiro de Vigo, participarán nesta iniciativa, que se desenvolverá entre o 8 de setembro e o 31 de outubro.
Entre as entidades coas que a Facultade de Ciencias Empresariais e Turismo do campus de Ourense conta cunha dilatada traxectoria de colaboración desde hai máis dunha década está Riu Hotels&Resorts. Cada curso académico, catro ou cinco dos seus estudantes de grao son seleccionados para participar no plan de carreira que ten a cadea hoteleira para captar e formar aos seus cargos de dirección. Así, na actualidade arredor dunha trintena dos seus directivos e directivas no Caribe foron formados na facultade ourensá. Nas vindeiras semanas e ao abeiro deste programa, catro estudantes de Administración e Dirección de Empresas deste centro incorporaranse en prácticas a hoteis de Xamaica e México.
O plan de carreira desta cadea, que conta con arredor dun centenar de hoteis nunha vintena de países, comeza coa realización por parte do estudantado de seis meses de prácticas remuneradas e continúa, pasando sucesivos filtros, coa súa contratación como subdirector ou subdirectora júnior. Comeza así unha traxectoria profesional que pode continuar logo cunha subdirección sénior e finalmente coa dirección hoteleira. Tralo proceso de formación en prácticas, indican desde a facultade, en arredor do 85% dos casos Riu proponlle ás e aos estudantes un contrato laboral como subdirectores júnior en Centroamérica.
O pasado 23 de maio, a Facultade de Ciencias Empresariais e Turismo da Universidade de Vigo celebrou con gran emoción o seu acto de Graduación 2025, no salón de actos Marie Curie do Edificio Politécnico do campus de Ourense. Máis de 80 estudantes puxeron fin a unha etapa inesquecible, acompañados por familiares, amizades, profesorado e autoridades académicas e institucionais.
O evento estivo presidido polo Reitor da Universidade de Vigo, Manuel Reigosa, e contou coa presenza do Conselleiro de Educación, Ciencia, Universidades e Formación Profesional, Román Rodríguez.
Promocións graduadas: 49 estudantes da XV promoción do Grao en ADE, 15 estudantes da XIV promoción do Grao en Turismo, 17 estudantes da VII promoción da simultaneidade ADE-Dereito, 4 estudantes da IV promoción da simultaneidade Turismo-Xeografía e Historia, 5 estudantes da II promoción do Título Propio para o Emprego e Vida Autónoma e 4 estudantes da XIV promoción do Máster en Xestión Empresarial do Deporte
Padriños e madriñas das promocións: Mª Montserrat Cruz e Alejandra Seara (Consorcio de Turismo da Ribeira Sacra) para Turismo e Turismo-Xeografía e Historia, Jesús Vázquez e Jorge Vázquez (Redegal) para ADE e ADE-Dereito e Vanessa Suárez para o Título Propio para o Emprego e Vida Autónoma
Durante o acto tamén se fixo un recoñecemento especial ás alumnas premiadas con galardóns extraordinarios no curso anterior, nun ambiente cheo de emoción, orgullo e ilusión polo futuro.
Desde a Facultade de Ciencias Empresariais e Turismo queremos agradecer a todas as persoas que fixeron posible este día tan especial: ao profesorado, ao persoal da facultade, ás familias e amizades, e sobre todo ao noso estudantado, verdadeiro motor da nosa comunidade universitaria.
📸 Galería de fotos do evento: Accede aquí
A Facultade de Ciencias Empresariais e Turismo do campus de Ourense celebrou este mércores a votación para elixir novo decano, xa que a ata a de agora responsable, Montserrat Cruz, esgotou os dous posibles mandatos á fronte do centro. Na votación da Xunta de Facultade, a candidatura presentada polo profesor Jesús Vázquez gañou por 29 votos, fronte aos 27 acadados polo outro candidato, Francisco Javier Sánchez, habendo ademais un voto en branco.
O novo decano é profesor titular desde o ano 2003 no Departamento de Organización de Empresas e Márketing. Ten ocupado diferentes cargos de xestión académica, como decano da Facultade de Ciencias Empresariais e Turismo entre 2006 e 2008 e secretario da escola que precedeu ao actual centro. É membro do grupo de investigación OC2 Organización e Comercialización. O equipo decanal de Jesús Vázquez estará formado por Trinidad Domínguez como secretaría e Mercedes Mareque, Elena Shakina e Manuel Mosquera como vicedecanos.
A evolución da sociedade española a través da publicidade. Este foi o título e a temática dunha conferencia ofrecida este luns na Facultade de Ciencias Empresariais e Turismo do campus de Ourense por María Álvarez, directora xeral en España de Dentsu X, unha das axencias de publicidade máis grandes do mundo.
A actividade estivo organizada pola facultade, polo grupo de investigación Gen e pola Cátedra de Empresa Familiar da Universidade de Vigo, contando ademais co apoio de Ecobas. Foi presentada por Montserrat Cruz, decana da facultade, e Elena Rivo, directora da citada cátedra, que destacaron a dilatada traxectoria de máis de dúas décadas da relatora convidada; a súa paixón polo márketing e a comunicación e a súa capacidade de liderado e traballo en equipo. Alén do contido específico da conferencia, desde a organización do acto destacaron a pertinencia e o interese de que o alumnado de Ciencias Empresariais e Turismo coñeza de primeira man perfís profesionais e traxectorias de éxito como o da convidada este martes.
O Centro Cultural Marcos Valcárcel de Ourense acollerá os días 19 e 26 de marzo a celebración das I Xornadas sobre termalismo: auga, saúde e coñecemento. Ao longo das dúas sesións, especialistas de diferentes áreas exporán as súas investigacións e traballos arredor do potencial das augas termais, abranguendo desde a súa consideración xurídica e potencial turístico ata as súas aplicacións en saúde, benestar e gastronomía.
A cita está organizada desde a Escola Universitaria de Enfermaría de Ourense, centro adscrito á UVigo, co apoio do Campus Auga, o proxecto de especialización do campus de Ourense acreditado pola Xunta de Galicia que ten o termalismo entre os seus eixes de traballo. Concretamente, o comité organizador das xornadas está formado polas profesoras da citada escola Mª Reyes Pérez, Mª Milagros Fernández e Natalia Olida Fariñas. A actividade está dirixida tanto a público especializado no eido do termalismo e a saúde como a público xeral.