A Universidade de Vigo celebrou este venres o acto conmemorativo do 50 aniversario dos estudos universitarios en Ourense. Percorrendo o camiño do persoal ao colectivo, membros que foron ou son da comunidade universitaria e representantes de numeras entidades compartiron lembranzas, anécdotas e emocións nunha homenaxe á historia do que hoxe é o campus de Ourense e do colectivo que o fixo posible.
O acto contou coa asistencia de Manuel Reigosa, reitor da Universidade de Vigo; a secretaria xeral e vicerreitores e vicerreitoras da institución académica, entre eles Francisco Javier Rodríguez, vicerreitor do campus de Ourense; anteriores responsables académicos; numerosas autoridades en representación das diferentes administracións públicas, colexios profesionais, empresas e outras entidades, ademais de membros da comunidade universitaria.
Este martes presentouse en Madrid o libro Centenario del Turismo Español, unha publicación que reúne 55 especialistas de 25 universidades españolas e das diferentes comunidades autónomas para ofrecer un exhaustivo repaso pola historia deste sector. Entre elas e eles, está un equipo da Facultade de Ciencias Empresariais e Turismo do campus de Ourense formado por cinco profesoras e profesores, como son Montserrat Cruz, Francisco Javier Sánchez, Antonio Fraiz, Noelia Araújo e Diego Rodríguez.
A publicación, un proxecto desenvolvido pola plataforma Nexotur, “quere recoller os aspectos máis importantes do turismo en España, en todas e cada unha das súas vertentes, co fin de conmemorar o centenario do turismo en España”, explica Montserrat Cruz, decana da Facultade de Ciencias Empresariais e Turismo do campus. Trátase, indica o equipo da UVigo, dun traballo que se realizou durante algo máis dun ano e no que investigadoras e investigadores de todas as áreas turísticas realizaron as súas achegas científico-técnicas. Entre elas destacan capítulos sobre hostalaría e aloxamento, distribución de viaxes, modos de transporte, destinos e administracións, infraestruturas turísticas, grupos e asociacións e outros segmentos turísticos.
O Consejo Económico y Social de España (CES) entregou este martes en Madrid o seu XXII Premio de Investigación, dotado con 40.000 euros, ao proxecto de ciberseguridade Gardiáns dixitais para un crecemento sostible: ciberseguridade e protección cidadá na era da transformación dixital. O traballo foi realizado por equipo dirixido por Alberto Vaquero, profesor titular de Economía Aplicada da Facultade de Ciencias Empresariais e Turismo do campus de Ourense, e conformado por outros nove investigadores e investigadoras, docentes da Universidade de Vigo e da Universidade de Santiago de Compostela de distintas disciplinas, como son a Economía Aplicada, a Organización de Empresa e Comercialización, o Dereito Administrativo e Laboral e as Ciencias da Computación e Intelixencia Artificial.
Tras a recollida do premio, Alberto Vaquero destacou que “queremos agradecer ao CES a oportunidade que tivemos de colaborar cunha institución tan relevante no ámbito socioeconómico e laboral. Para todo o equipo foi un orgullo que confiase en nós para realizar unha investigación que confiamos se converta nun referente no campo da ciberseguridade pola súa perspectiva integradora, inclusiva e multidisciplinar”. Así, o director do proxecto gañador destaca que o estudo vai dirixido a un público non técnico, coa idea de que sexa “accesible para o día a día do usuario” e tendo en conta que a ciberseguridade “afecta xa á cidadanía e ás persoas, aos dereitos dixitais, ás empresas, ás institucións, etc”.
A Facultade de Ciencias Empresariais e Turismo do campus de Ourense celebrou este martes o acto de entrega dos seus Premios TFG José Manuel Pérez Canal, nos que se distinguen os mellores traballos fin de grao do alumnado dos diferentes graos que se imparten neste centro. Os primeiros premios foron para estudos sobre a avaliación da rendibilidade social do destino Ourense Termal e sobre a promoción turística do Camiño de Santiago en series de televisión.
O acto de entrega contou coa participación de Francisco Javier Rodríguez, vicerreitor do campus de Ourense; Montserrat Cruz, decana da Facultade de Ciencias Empresariais e Turismo; Rosendo Fernández, deputado de Representación Institucional; Marisol Novoa, presidenta da Confederación Empresarial de Ourense; Carmen Lence, socia e CEO do Grupo Lence, e Pilar García, responsable de Recursos Humanos do Grupo Hotusa. Nas súas intervencións, destacaron como estes galardóns recoñecen o esforzo e o talento do estudantado e tiveron palabras de lembranza para José Manuel Pérez Canal, cuxa familia estaba presente.
A Facultade de Ciencias Empresariais e Turismo do campus de Ourense acolleu este martes a celebración da xornada de transferencia Análise de mecanismos temporais de regulación de emprego. A sostibilidade empresarial como obxectivo. A actividade tivo como obxectivo achegar ao alumnado do centro e da Facultade de Dereito o papel dos ERTE como instrumento "non só para garantir o emprego das persoas traballadoras senón tamén para que as empresas que se atopan nunha mala situación sobrevida por causas non imputables ao seu propio comportamento, poidan seguir operando e logo retomar novamente o seu funcionamiento normal".
A actividade, coordinada polas profesoras María Montserrat Cruz e Elena Rivo coa colaboración de Alberto Vaquero, enmárcase na programación do proxecto Adaptación e mantemento de emprego no novo ecosistema produtivo, liderado polo catedrático da UVigo Jaime Cabeza. Está financiado polo Ministerio de Ciencia e Innovación para o período 2022-2025 e conta coa participación de especialistas de Dereito do Traballo e a Seguridade Social e a colaboración de persoal investigador dos departamentos de Organización de Empresas e Márketing e Economía Aplicada, entre eles María Montserrat Cruz e Alberto Vaquero. Esta multidisciplinariedade permite que unha das liñas de investigación que se desenvolve ao seu abeiro sexa unha triple aproximación (xurídica/empresarial e económica) á temática elixida.
Alumnado da Facultade de Ciencias Empresariais e Turismo do campus de Ourense participa no proxecto ACD_Mar, Laboratorio para o fomento da accesibilidade e inclusión de persoas con discapacidade na promoción do patrimonio cultural marítimo pesqueiro. Trátase dunha iniciativa posta en marcha por Fundamar, a Asociación Amicos e a Universidade da Coruña co obxectivo de fomentar a promoción dunha cultura accesible e inclusiva, na que se involucren activamente os e as futuras profesionais do sector turístico (neste caso alumnado do Grao de Turismo da Universidade de Vigo), o sector pesqueiro e marítimo e persoas con discapacidade.
Ao abeiro da iniciativa, membros do equipo do proxecto ofreceron unha charla na Facultade de Ciencias Empresariais e Turismo a un grupo de alumnas e alumnos coordinado pola catedrática da UVigo e profesora deste centro Elisa Alén. Nela presentaron os retos e oportunidades aos que debe facer fronte a promoción do patrimonio cultural pesquerio en materia de inclusión e accesibilidade. Posteriormente, o alumnado ourensá realizou unha visita formativa ao porto de Vigo para coñecer de primeira man o sector. Esta fase de ACD_Mar está dirixida a pór en contacto aos actores que participarán no proxecto para desembocar en encontros entre estudantes e profesionais con persoas con discapacidade nos que se identifiquen os retos e solucións en materia de accesibilidade e inclusión na temática elixida. Este é o primeiro paso para a implementación dun laboratorio para estudar e deseñar solucións de accesibilidade que xiren en torno a servizos culturais adaptados a todas as persoas, con independencia das súas capacidades físicas ou cognitivas, que poidan ser implantadas con éxito en entidades de economía social.
A Cátedra de Empresa Familiar da Universidade de Vigo arrancou este martes a súa programación aberta ao público deste curso académico 2024/2025. Fíxoo cunha conferencia titulada A xestión na empresa familiar: a visión dun executivo non familiar, ofrecida por Carlos Rivo López, director comercial de UNVI (Grupo Pérez Rumbao). O acto tivo lugar na Facultade de Ciencias Empresariais e Turismo do campus de Ourense, contando coa colaboración da Asociación Galega de Empresa Familiar (entidade que apoia a citada cátedra da UVigo) e coa asistencia de alumnado deste centro.
A conferencia foi presentada por Montserrat Cruz, decana da facultade anfitrioa, que destacou na súa apertura a dilatada traxectoria do convidado en diferentes empresas. Na súa conferencia, Carlos Rivo quixo “non tanto dar información teórica sobre a empresa familiar senón o meu punto de vista sobre ela, en base á miña experiencia de empregado en empresas familiares e en empresas non familiares”. Así, ao longo da súa intervención analizou diferentes perspectivas que unhas e outras teñen sobre diversos aspectos, desde a organización ata as expectativas de crecemento, co obxectivo de que a alumnado presente tivese “unhas pautas que lles permitan ter unha visión máis axustada á realidade da empresa familiar”.
O Mestrado en Xestión Empresarial do Deporte, que se imparte na Facultade de Ciencias Empresariais e Turismo do campus de Ourense, arrancou este curso académico 2024/2025 sumando bos resultados. Por unha banda, acadou un ano máis estar no “top-ten” europeo dos mellores posgraos da súa área e por outra continúa a afianzar a súa faciana internacional, acollendo este ano estudantes de once nacionalidades.
No ránking SportBusiness de 2024, feito público recentemente, este mestrado sitúase sétimo de Europa e 25 do mundo. Sobre este resultado, Patricio Sánchez, coordinador do título, sinala que “supón toda una alegría (e unha responsabilidade) que un posgrao como o noso se posicione nun ránking tan prestixioso, ao carón de universidades internacionais de referencia no ámbito da xestión deportiva”. SportBusiness é unha asociación da industria do deporte, principalmente profesionais, que conta con diferentes ránkings, un deles dedicado á formación de posgrao. Así, o SportBusiness Postgraduate Rankings preséntase como “o ránking máis completo e detallado” dos mellores posgraos de xestión deportiva, tendo como obxectivo proporcionar a alumnado e profesionais “o sistema de clasificación máis confiable e respectado” no seu eido. Para acadalo, a entidade valora aspectos de cada mestrado como a internacionalización de alumnado e profesorado, a calidade docente ou a empregabilidade.
A Facultade de Ciencias Empresariais e Turismo do campus de Ourense celebrou este xoves a conferencia Estratexias de márketing para emprendedores/as: a importancia dos activos intanxibles. Nela, Alicia Cándida Blanco, catedrática da Área de Comercialización e Investigación de Mercados da Universidad Rey Juan Carlos, explicou aos membros da comunidade universitaria presentes algunhas das claves específicas que deben ter en conta as e os emprendedores para conseguir atopar un oco nun mercado cada vez máis complexo.
A relatora, presentada polo catedrático da UVigo José Antonio Fraiz, centrouse en explicar como as e os emprendedores poden xestionar os activos intanxibles dos seus proxectos para obter bos resultados. Como premisa de partida, lembrou que os obxectivos tradicionais que contemplan os plans de empresa non se adecúan ás necesidades das e dos emprendedores, xa que estes non dispoñen de activos como a marca, a reputación e mesmo ventas. Pola contra, ao longo da súa intervención foi analizando algúns dos activos intanxibles que si poden aplicar, citando entre eles a lexitimidade, a aceptación social do emprendemento. Pondo exemplos de emprendedoras e emprendedores lexitimados que si lograron sacar adiante os seus proxectos, Alicia Cándida Blanco foi achegándose ao longo da súa conferencia a cuestións moi importantes para os emprendementos tales como xerar unha rede de socios para ter máis fortaleza, atraer recursos humanos ou aproveitar os beneficios dos viveiros de empresas.